50 hross með 1. verðlaun

Á árinu 2020 náðum við þeim áfanga að  50 hross frá Steinnesi hafa hlotið 1. verðlaun í kynbótadómi og verður að segjast að okkur finnst þetta sannarlega skemmtilegt.

Þegar við lítum yfir hópinn bærast ljúfar tilfinningar í brjósti. Gaman er að sjá hvað hrossin hafa skilað miklu til okkar ræktunar hér heima í Steinnesi og hjá sínum nýju eigendum. Okkur finnst líka áhugavert hvernig þau hafa dreifst til ýmissa landa þar sem þau hafa verið notuð í ræktunarstarfi eða verið eigendum sínum til ánægju á annan hátt.

Að hafa náð þessum áfanga er gríðarlega ánægjulegt og það veitir okkur byr undir báða vængi til að halda áfram. Nú er stefnan tekin á þriggja stafa tölu og vonandi byrjar sú talning með látum í vor.

Hér má sjá lista yfir 1. verðlauna hrossin frá Steinnesi.